هو ثلث عمرك ال بتقضه في الشغل دا بتاخد ثواب عليه و لا وقت ضايع؟
اعمل save للبوست دا و شيره عندك عشان ترجع ليه في أي وقت!
بما اننا جيل اتحط في ظروف اقتصادية صعبه و بقي اغلبنا بيروح من يومه اكتر بكتير من 8 ساعات للشغل و المواصلات و طبعا دا غير ال شغال شغلانتين في اليوم
و في حالة مجالي مثلا ال performance marketing فاحنا بنشتغل ال 8 ساعات و بنشتغل آناء الليل و أطراف النهار و اخر بهدله
## فهنا كان السؤال هل الوقت ال بيروح مننا دا كله و ال بقي اجبار علي جيلنا انهم يضحوا بيه هناخد عليه ثواب و خصوصا ان باقي اليوم مش بنقدر نعمل فيه طاعات كتير و ال بنقدر عليه علي قد الصلاة و الصوم؟..
هنا كان لازم ابحث و ادور علي ازاي اقدر احتسب فتره ال عمل ال مش قليله نهائي دي لله و اخذ عليها ثواب، فكانت الإجابة الأساسية هي: #النية
قال النبي صلى الله عليه وسلم : ( إِنَّمَا الأَعْمَالُ بِالنِّيَّاتِ ، وَإِنَّمَا لِكُلِّ امْرِئٍ مَا نَوَى ) رواه البخاري ومسلم
فالنية تحول المباحات إلى طاعات وقربات ، و يجب جعلها لله تعالى ، خالصة من شوائب الرياء والسمعة.
و ابسط مثال علي الاحتساب، حديث في البخاري سأل الرسول صل الله عليه و سلم معاذ بن جبل:
فَكيفَ تَقْرَأُ أنْتَ يا مُعَاذُ؟ قالَ: أنام أول الليل، فأقوم وقد قضيت جزئي من النوم، فأقرأ ما كتب الله لي، فأحتسب نومتي كما أحتسب قومتي.
يعني هنا احتسب حتي النوم علي سبيل انه بينام ليقوي علي الطاعة فيحصل اجر للقيام و اجر للنوم.
## طب لو انا نسيت و نازل الشغل من غير ما احتسب نيه؟
هنا لقيت من خلال البحث بتاعي في المصادر الـ هتلاقيها تحت،
* اجماع علي ان لو عملك ادي لإفادة متعدية زي انك في عملك علمت زميل لك معلومة فادته فأنت كده هتأخذ ثواب التعليم دا حتي لو من غير نيه او الفلوس ال جمعتها دي بتصرف بيها علي اهلك فدا هتاخذ عليه ثواب و لكن لو احتسبتها هيكون الثواب أعظم و كمثال لعظم الأجر ففي مثال الصرف علي الأهل لو احتسبتها مثلا بنص حديث الرسول “إذا أنفق الرجل على أهله نفقة #يحتسبها فهي له صدقة”
* بخصوص عملك نفسه بقي ففي اثنين من الآراء :
– رأي يري أنك لا تؤجر علي العمل نفسه ما لم تنوي نيه و لا يمكن ان تحتسب العمل الماضي لأنك لم تنوي قبله.
– رأي يري أنك تؤجر طلما هو عمل فيه نفع -من باب الرجاء من الله- و لكن احتساب العمل لله و استحضار نيه هو أعظم في الثواب
** فالأفضل لك ان تستحضر النية و تحتسب عملك لله لكي تنال الأجر **
طب تمام انا كده هنزل و هستحضر نية و هحتسب شغلي لله، هنا خليني اقولك بقي لازم تخلي بالك انك لازم تجعلها لله تعالى ، خالصة من شوائب الرياء والسمعة. رغبة في طاعة الله و مرضاته و ليس للوصول لرضا فلان او ليقال عني كذا و كذا و هكذا من الشوائب ال ممكن تفسد النيه.
طب أقول ايه؟
هنا بقي انا جمعت لك كذا نيه ممكن تستحضرهم و انت نازل الشغل عشان تحصل الثواب بإذن الله:
1- العمل لوجه الله تعالى وطاعته.
2- توفير لقمة العيش الحلال لنفسك وعائلتك.
3- مساعدة الزملاء والعملاء بحسن نية والأخلاق حسنة.
4- السعي لتطوير مهاراتك المهنية والشخصية لتحسين قدراتك وخدمة دينك ومجتمعك.
5- تحسين مستوى الإنتاجية والابتكار في مجال عملك مصداق لحديث الرسول إن الله يحب إذا عمل أحدكم عملا أن يتقنه.
6- استغلال فرص العمل لتعزيز الصدقات والأعمال الخيرية من خلال دعم المحتاجين والمشاريع الخيرية.
7- نشر الأمانة والنزاهة والاحترام في مكان العمل.
8- التنمية المهنية للزملاء والموظفين الجدد بوضع المعرفة والخبرة المكتسبة في خدمتهم و تعليمهم.
9- القدرة علي مساعدة الفقراء و المساكين.
تقدر تكيف النوايا دي علي حسب شغلك و مهم جدا تجديد النية اول بأول و تستحضر نيتك و تحتسب عملك لله عشان تيجي يوم القيامة إن شاء الله و يكون أوقات العمل في ميزان حسناتنا.